Gürcüstan Daxili İşlər Nazirliyinin əməkdaşları prokurorluq nümayəndələri ilə birlikdə “Xarici agentlər haqqında” Qanuna qarşı keçirilən mitinqlər zamanı iğtişaşlar törədən bir neçə nəfəri saxlayıblar.
Bu barədə Tbilisi Polis İdarəsinin rəisi Sulxan Tamazaşvili jurnalistlərlə keçirdiyi brifinqdə danışıb.
Məlumata görə, ümumilikdə altı nəfər həbs olunub. Onlar Gürcüstan paytaxtında keçirilən nümayişlərdə vəzifəsini yerinə yetirən hüquq-mühafizə orqanlarının əməkdaşlarına hücum etməkdə və başqalarının əmlakına ziyan vurmaqda ittiham olunublar.
Qeyd edək ki, mayın 1-də Gürcüstan parlamenti “Xarici agentlər haqqında” Qanunu ikinci oxunuşda qəbul edib. Sənədin lehinə 83, əleyhinə isə 23 deputat səs verib.
Daha sonra Tbilisidə kütləvi etiraz aksiyası keçirilib və etirazçılar parlament binasının girişlərindən birinə maneələr yaradıb və onun xidməti girişindəki darvazanı sındırmağa cəhd ediblər. Nəticədə polis xüsusi təyinatlıları nümayişçiləri saxlamağa başlayıb.
Mayın 13-də qanunvericilərin layihəyə üçüncü oxunuşda baxacağı gözlənilir. Ölkənin hakim partiyasının üzvü Anri Oxanaşvilinin qeyd etdiyi kimi, hüquq komitəsinin qarşıdakı iclasında yalnız qanunvericiliyə düzəlişlər müzakirə olunacaq.
Mənbə: Gazeta.ru
Rəylər