FİFA-dan qapalı Avropa Superliqası ilə bağlı bəyanat - FOTO

Beynəlxalq Futbol Federasiyaları Assosiasiyası FİFA və altı qitə konfederasiyası qapalı Avropa Superliqasının yaradılması ilə bağlı gəzən şayiələrə aydınlıq gətirmək üçün birgə bəyanat yayıb.

Bu barədə məlumat FİFA-nın rəsmi “Tvitter” hesabında paylaşılıb. Bütün qitə federasiyaları və FİFA rəhbərləri tərəfindən imzalanan bəyanatda şayiələrin həqiqəti əks etdirmədiyi bildirilib.

“Əgər belə bir hal baş verərsə, bu liqanın bizim tərəfimizdən tanınması qeyri-mümkündür və idman prinsiplərinə ziddir. Liqada iştirak edəcək klublar bizim turnirlərə buraxılmayacaq”, - deyə sənəddə bildirilir.

Qeyd edək ki, UEFA-nın nəzarətindən kənar qapalı Avropa Superliqasının yaradılması ideyası artıq bir neçə müddətdir ki, futbol ictimaiyyəti arasında dolaşır. Artıq bir sıra nəhəng klublar, o cümlədən də “Bavariya”, “Borussiya” (Dortmund), “Real”, “Yuventus”, “Arsenal”, “Barselona” və “Milan” bu fikri dəstəkləyiblər. Yeni Avropa Superliqasının Çempionlar Liqasına alternativ olaraq yaradılması nəzərdə tutulur.