2020-ci ildə bələdiyyələrlə bağlı neçə akt tərtib edilib? - RƏSMİ
2020-ci ildə bələdiyyələrlə bağlı neçə akt tərtib edilib? - RƏSMİ
“Ölkə qanunvericiliyinə müvafiq olaraq nazirliyin tabeliyində olan Bələdiyyələrlə iş mərkəzi tərəfindən 79 858 akt tərtib olunub, 76 433 akt qanuna uyğun olub. Normativ hüquqi aktların tələblərinə zidd olan 2 939 aktın isə dəyişdirilməsi və ləğvi üçün aidiyyəti üzrə tapşırıq verilib”.
Bu sözləri Ədliyyə Nazirliyinin 2020-ci ilin yekunlarına həsr olunmuş onlayn mətbuat konfransında Ədliyyə Nazirliyinin Bələdiyyələrlə iş mərkəzinin rəisi Rəhman Məmmədov deyib.
O bildirib ki, pandemiya dövründə digər sahələrdə olduğu kimi Bələdiyyələrlə iş mərkəzinin də fəaliyyətində çətinliklər yaranıb:
“İnzibati tədbirlər görülməsi nəticəsində bələdiyyə aktlarının ləğvi məsələləri 0,5 faiz azalıb.
İl ərzində bələdiyyələrin fəaliyyəti ilə bağlı 3 min 503 müraciətə baxılıb, bu əvvəlki illərlə müqayisədə 6% çoxdur. Təmin edilən müraciətlərin sayı isə 17 faiz artıb. Bu istiqamətdə 800 nəfərin qəbulu həyata keçirilib.
Bununla yanaşı, müraciətlərə baxılması nəticəsində qanunvericiliyin tələblərinə zidd olan 328, ötən ildən 45% çox bələdiyyə aktının dəyişdirilməsi və ya ləğvi ilə bağlı aidiyyəti bələdiyyələrə təkliflər verilib.
Eyni zamanda ötən il ərzində nazirlik tərəfindən verilən ümumilikdə 3267 təklifdən 15-i bələdiyyələr tərəfindən təmin edilmədiyinə görə qanunvericiliyin tələbinə uyğun olaraq nazirlik tərəfindən məhkəmələrdə 15 iddia qaldırılıb. Onlardan 2-si məhkəmə tərəfindən təmin edilmiş, 13-ü isə məhkəməlrin icraatındadır”.
Könül Cəfərli